चन्द्रगढी वनमा दुई समूहको उम्मेदवारी दर्ता

भद्रपुर । चन्द्रगढी सामुदायिक वन उपभोक्ता समितिको कार्तिक ३० गते हुने निर्वाचनका लागि दुई वटा समूहले उम्मेदवारी दर्ता गराएका छन् ।

नेपाली काँग्रेस, नेकपा माओवादी केन्द्र र नेकपा संघीय समाजवादीको सम्युक्त गठबन्धनको नेतृत्व गर्दै पूर्व अध्यक्ष दुर्गाप्रसाद भट्टराई र नेकपा एमाले र राप्रपाको गठबन्धनमा पूर्व उपाध्यक्ष चुडामणि मैनालीको नेतृत्वमा प्यानल नै खडा गरेर उम्मेदवारी दर्ता गरिएको हो ।

भट्राई नेतृत्वको गठबन्धनको उपाध्यक्षमा शालिग्राम नेपाल, सचिव पार्वती मल्ल, सहसचिव यमप्रसाद खरेल र कोषाध्यक्षमा भारतसिंह राजवंशी रहेका छन् भने मैनाली नेतृत्वमा उपाध्यक्षमा गोकुल ढकाल, सचिव भानु पोखरेल, सहसचिव ईश्वरीप्रसाद रिजाल र कोषाध्यक्षमा अनुज खतिवडाको उम्मेदवारी रहेको छ ।

दुई हजार भन्दा बढी उपभोक्ता रहेको समूहलाई ६ वटा क्षेत्रमा विभाजन गरिएको छ । समितिका लागि एक एक जना टोल संयोजक र एक एक जना महिला सदस्य सहित आदिवासी जनजाति, दलित, महिला, अपाङ्ग समेत २१ सदस्यीय समितिका लागि दुवै समूहले उम्मेदवारी दिएका छन् भने खगेन्द्र विमलीले स्वतन्त्र रूपमा कोषध्यक्षमा उम्मेदवारी दर्ता गरेका छन् ।