मुलुकका लागि त्योजस्तो दुर्भाग्य अरु हुन्न

—दिनेश श्रेष्ठ (उपाध्यक्ष, उद्योग वाणिज्य महासंघ)

फेरि पनि मुलुक लकडाउनमा जाने अवस्था आयो भने मुलुकका लागि त्यो जस्तो दुर्भाग्य अरु हुन्न । किनकि भर्खरमात्र हामी डुबेको अर्थतन्त्रबाट तङ्ग्रिदै छौं । फेरि पनि लकडाउनमा गइयो भने त जहाज डुबिहाल्यो नि !

कोभिड–१९ का कारण बिग्रिएको अर्थतन्त्र, ‘चेन अफ इकोनोमी’ विस्तारै लयमा आउन थालेको बेला फेरि लकडाउनमा गइयो भने त सबै ध्वस्त हुन्छन् । परिणामतः यस्तो परिस्थितिले निजी क्षेत्रलाईमात्र नभएर मुलुकै अर्थतन्त्र डामाडोलको स्थिति बन्न सक्छ । त्यसैले हामी पुनः लकडाउनको त परिकल्पना पनि गर्न सक्दैनौं ।

अब भनेको समस्या आइहाल्यो भने पनि सुरक्षित र संयमित भएर त्यसको सामना गर्ने हो । सुरक्षित भएर काम गर्ने हो । तर, यसको पूर्वतयारी भने सरकार–निजी क्षेत्र कसैमा पनि खासै देखिँदैन । यति ठूलो पाठ सिकिसक्दा समेत अहिलेसम्म हाम्रो ध्यान पूर्वतयारीमा छैन । कोभिड–१९ को दोस्रो लहर छिमेकी देशमा देखा परिसकेको अवस्थामा नेपालले त्यसको पूर्वतयारी गर्नुपर्ने हो । सीमा नाकाहरुमा कडाई, चेकजाँचलाई तीव्रता दिनुपर्ने हो । तर त्यसो हुन सकेको छैन । हामी सरकारसँग अबिलम्ब त्यसको प्रवन्ध मिलाउन माग गर्दछौं ।