लकडाउन मात्र समस्याको समाधान होइन

—राजेशकाजी श्रेष्ठ (अध्यक्ष, चेम्बर अफ कमर्स)

अब फेरि लकडाउन ! त्यो मुलुकले सोच्न पनि सक्दैन । किनकि लकडाउनको तितो र नमिठो अनुभव हामीले बेहोरिसक्यौँ, जुन आज पर्यन्त हामीले बेहोर्दै छौं । अहिले पनि कयौं उद्योग कल–कारखाना सञ्चालनमा आउन सकेका छैनन् । प्रमुखतः मुलुकको पर्यटन क्षेत्र अहिलेसम्म उठ्न सकेको छैन । मुलुकको उत्पादन, वैदेशिक व्यापार आजको दिनसम्म सहज हुन सकेको छैन । यस्तो अवस्थामा फेरि हामी कसरी लकडाउनमा जान सक्छौं र ? लकडाउनमात्र समस्याको ‘सोलुसन’ हो र ? अब लकडाउनमा जाने भन्दा पनि सचेत र संयमित हुने हो । सम्भावित समस्याको पूर्वतयारीमा बस्ने हो, न कि लकडाउन गर्ने ।

पहिलेको कमी कमजोरीबाट पाठ सिकेर अब हामी फेरि लकडाउनमा जानु हुँदैन । हामी निजी व्यवसायीहरुको तर्फबाट सरकारलाई यही सल्लाह–सुझाव दिन चाहन्छौं कि समस्या नै आइहाल्यो भने पनि पहिलेजस्तो लहडको भरमा आपतकालीन लकडाउन घोषणा नगरियोस् ।