दुर्घटनामा तीन जनाको ज्यान गयो

भद्रपुर २६ पुस । झापाको शिवसताक्षी नगरपालिकामा गएराती भएको सवारी सडक दुर्घटनामा परेर स्थानीय एक युवाको मृत्यु भएको छ । जिल्ला प्रहरी कार्यालय झापाका अनुसार शनिबार राति साढे ८ बजेतिर मोटरसाईकलवाट दमकदेखि झिलझिलेतर्फ घर जादै गरेका शिवसताक्षी ११ का ३८ वर्षीय छविरमण ढकालको दुर्घटनामा परेर मृत्यु भएको हो । उनी सवार मे ३ प ९८९६ नम्बरको मोटरसाइकलमा अनियन्त्रीत भएर धरमपुरको कमल खोला सडक खण्डमा दुर्घटना भएको थियो । दुर्घटनामा गंभीर भएका उनको राती १० वजेतिर विर्तामोडस्थित विएण्डसी अस्पतालमा उपचारका क्रममा मृत्युभएको प्रहरीले जनाएको छ ।

यसैगरि, हिजो शनिवार साँझतिर जिल्लाको बुद्दशान्ति गाउँपालिका ३ स्थित धाइजन चोकमा मे।१च। ५३९६ नम्बरको पिकअपलाई बिपरित दिशाबाट आउदै गरेको मे २ प ६९८४ नं को मोटरसाईकलले ठक्कर दिदाँ मोटरसाईकलमा सवार अर्जुनधाराका ५० बर्षिय छत्र बहादुर मगरको मृत्यु भएको जिल्ला प्रहरी कार्यालय झापाले जनाएको छ ।

यस्तै झापाबाट विराटनगर गएका एक युवकको बसभित्रै मृत्यु भएको छ । झापाको केर्खाबाट विराटनगर जाने जनसेवा यातायातको मे १ ख ३३३३ नम्बरको बसमा सवार २६ वर्षीय राजकुमार थापाको बसभित्रै मृत्यु भएको प्रहरीले जनाएको छ । प्रहरीका अनुसार ती युवक आइतबार बिहान केरखाबाट गाडीमा चढेका थिए ।

विराटनगर बसपार्कमा पुगेपछि उनी मृत अवस्थामा भेटिएको जिल्ला प्रहरी कार्यालय मोरङका डिएसपी मानबहादुर राईले बताए । मृतक थापा मिर्गौला रोगी हुन् । घरबाट उनी उपचारका लागि भन्दै एक्लै ‘नेशनल किड्नी सेन्टर विराटनगर गएको खुलेको छ ।