जिल्ला प्रहरी कार्यालय झापामा प्रहरी दिवश र रक्तदान

भद्रपुर ३० असोज । जिल्ला प्रहरी कार्यालय झापाले आज ६५औं प्रहरी दिवश मनाएको छ । कार्यालयका कार्यालय प्रमुख प्रहरी उपरीक्षक कृष्ण प्रसाद कोइरालाको अध्यक्षता र झापाका प्रमुख जिल्ला अधिकारी श्रवण कुमार तिमिल्सिनाको प्रमुख आतिथ्यतामा सम्पन्न कार्यक्रममा सुरक्षा निकाय प्रमुख, पूर्व प्रहरी संगठनका पदाधिकारी, अमर प्रहरी परिवारजन, प्रहरी कार्यमा सहयोग गर्ने संघ संस्था एवं शैक्षिक संघ संस्था प्रमुख, जग्गा दाता, पूर्व प्रहरी, रेडक्रस प्रतिनिधी लगायत १५० जनाको उपस्थिति रहेको थियो ।

कार्यक्रममा प्रमुख अतिथीज्युबाट अमर प्रहरी परिवारका सदस्यहरुलाई सम्मान, तालुक १ नं प्रदेश प्रहरी कार्यालय बिराटनगरबाट प्राप्त बहालवाला एवं पूर्व प्रहरी कर्मचारीको सन्ततीलाई छात्रवृति प्रदान गर्नुको साथै यस कार्यालय तथा मातहत प्रहरी कार्यालयहरुमा कार्यरत मध्ये उत्कृट कार्य सम्पादन गर्ने प्रहरीहरुलाई पुरस्कार प्रदान गरियो । यसैगरी ं बिभिन्न प्रहरी यूनिटहरुको लागि निशुल्क जग्गा प्रदान गर्नुहुने जग्गा दाताहरुलाई कदर पत्र प्रदान गरी सम्मान गरिएको थियो ।

यसै अवसरमा, जिल्ला रेडक्रस सोसाईटी भद्रपुर शाखाको सहयोगमा रक्तदान कार्यक्रम समेतको आयोजना गरिएको थियो । उक्त कार्यक्रममा यस कार्यालय तथा मातहत कार्यालय समेतमा कार्यरत ३२ जना प्रहरी अधिकृत एवं जवानले रक्तदान गरे ।