नेपालमा थपिए १४ सय ५४ जना कोरोना संक्रमित
काठमाडौं । पछिल्लो २४ घण्टामा देशका विभिन्न प्रयोगशालामा गरिएको पिसिआर परीक्षणमा थप १४ सय ५४ जना कोरोना संक्रमित बढेका छन् । थपिएको यो संख्यासँगै नेपालमा कोरोना संक्रमितको संख्या ५१ हजार ९१९ पुगेको छ । यस्तै, पछिल्लो २४ घण्टामा थप ९७२ जना कोरोना संक्रमण मुक्त भएका छन् ।
कुल डिस्चार्ज हुनेको संख्या ३६ हजार ६७२ पुगेको छ । यो संख्या कुल संक्रमितको ७१ प्रतिशत रहेको पनि स्वास्थ्य मन्त्रालयका प्रवक्ता जागेश्वर गौतमले बताए । आजसम्मको तथ्यांकअनुसार देशभरमा १४ हजार ९२५ सक्रिय संक्रमित छन् । देशभर क्वारेन्टाइनमा बस्नेहरूको संख्या ६ हजार ७८ छ । पछिल्लो २४ घण्टामा १० हजार ७०१ वटा पिसिआर परीक्षण भएको पनि प्रेस ब्रिफिङका क्रममा उनले जानकारी दिए ।