नेपालमा आज ४२१ संक्रमित थपिए एकको मृत्यु

काठमाडौँ । नेपालमा आज थप ४२१ जनामा कोरोना संक्रमण पुष्टि भएको छ । आज थपिएसँगै नेपालमा कोरोना संक्रमित हुनेको कुल संख्या नौ हजार २६ पुगेको मन्त्रालयले जनाएको छ । स्वास्थ्य मन्त्रालयको नियमित मिडिया ब्रिफिङमा मन्त्रालयका प्रवक्ता डाक्टर जागेश्वर गौतमले आज एकैदिन ४२१ जनाका कोरोना संक्रमण पुष्टि भएको जनाइएको छ । जसमा ३५७ जना पुरुष रहेका छन् भने ६४ जना महिला रहेका छन् । कुल संख्या नौ हजार २६ पुगेसँगै आठ हजार २०६ जना पुरुष रहेका छन् भने ८२० जना महिला मन्त्रालयले जनाएको छ ।

मन्त्रालयका अनुसार अहिलेसम्म पीसीआर विधिबाट एक लाख ७५ हजार एक सय ७३ र आरडीटी विधिबाट दुई लाख ६२ हजार एक सय ७४ जनाको नमुना परीक्षण गरिएको छ । क्वारेन्टाइनमा ९४ हजार ९ सय २८ छन् भने आइसोलेसनमा सात हजार दुई सय ३१ जनाको उपचार भइराखेको छ । नेपालमा कोरोना संक्रमण निको भएर आज १९४ जना डिस्चार्ज भएका छन् । जसमा १८६ जना पुरुष र ८ जना महिला रहेको मन्त्रालयले जनाएको छ । योसँगै कोरोना जित्नेको संख्या १ हजार ७७२ पुगेको छ । जसमा १ हजार ६२३ जना पुरुष रहेका छन् भने १४९ जना महिला रहेका छन् ।

नेपालमा कोरोनाबाट आज एकको मृत्यु भएको छ । गुल्मीमा होम क्वारेन्टिनमै मृत्यु भएका ६९ वर्षीय पुरुषमा कोरोना पुष्टि भएपछि मृतकको कूल संख्यामा १ थपिएको हो । याोसंगै मृत्यु हुनेको संख्या २३ पुगेको छ ।