टिपरको ठक्करबाट एक किशोरीको मृत्यु
भद्रपुर ७ माघ । मेची राजमार्ग अन्तरगत झापाको भद्रपुर(चाराआली सडक खण्डमा टिपरको ठक्करबाट एक किशोरीको मृत्यु भएको छ । मृत्यु हुनेमा मेचीनगर नगरपालिका १३ निवासी १८ बर्षिया अन्सु शिवाकोटी रहेको प्रहरी कार्यालय झापाका डिएसपी राकेश थापाले जानकारी दिए ।
प्रहरीका अनुसार सो सडक खण्डमा दक्षिणबाट उत्तर तर्फ जाँदै गरेको मे १ ख २५१५ नम्बरको टिपरले पैदलयात्री शिवाकोटीलाई ठक्कर दिएको थियोे । उनको टाउकोमा गम्भीर चोट लागेको थियो । साथै उनीसँग हिडेका अर्को पैदलयात्री १८ बर्षिय राहुल बस्नेत घाइते भएका छन् । उनको हात र खुट्टामा चोट लागेको छ ।
घाइते दुवैलाई उपचार लागि बिएण्डसी हस्पिटल बिर्तामोड लगिएकोमा शिवाकोटीको उपचारको क्रममा मृत्यु भएको प्रहरीले जनाएको छ । यता इलाका प्रहरी कार्यालय धुलाबारीले टिपरसहित भद्रपुर नगरपालिका ९ बस्ने ३२ बर्षिय चालक कोसुमन ओझालाई नियन्त्रणमा लिएको छ ।