पञ्जाब १२ अंकसहित चौथो स्थानमा उक्लियो

एजेन्सी

इण्डियन प्रिमियर लिगमा किंग्स इलेभेन पञ्जाबले कोलकोता नाइट राइडर्सलाई ८ विकेटले पराजित गरेको छ । कोलकोताले दिएको १५० रनको लक्ष्य पछाएको पञ्जाबले २ विकेट गुमाउदै लक्ष्य पुरा गरेको हो । पञ्जाबको जितमा मनदीप सिंह र क्रिस गेलले अर्धशतक बनाए । मनदीपले अविजित ६६ रन बनाए भने क्रिस गेलले ५१ रन बनाए । कोलकोताका लागि एक विकेट वरुण चक्रवर्तीले लिएका थिए ।

यस अघि टस हारेर पहिला ब्याटिंग गरेको कोलकोताले २० ओभरमा ९ विकेट गुमाउदै १४९ रन बनाएको थियो । कोलकोताका लागि शुभमन गिलले ५७ रन बनाए भने कप्तान इयोन मोर्गनले ४० रन बनाएका थिए ।

पञ्जाबका बलर मोहमद सामीले ३ विकेट लिए भने क्रिस जोर्डन र रवी विश्नोईले २।२ विकेट लिए । त्यस्तै मुर्गन आश्विन र ग्लेन म्याक्सवेलले एक।एक विकेट लिए ।

यो जितपछि पञ्जाबले १२ खेलमा छैठौ जित हासिल गरेको छ । पञ्जाब १२ अंकसहित चौथो स्थानमा उक्लिएको छ । त्यस्तै कोलकोताले १२ खेलमा छैठौ हार बेहोरेको छ ।