नेपालमा कोरोना संक्रमित दश हजार नाघे, मृतकको संख्या २४ पुग्यो

काठमाडौँ । नेपालमा आज थप ५३८ जनामा कोरोना संक्रमण पुष्टि भएको छ । आज थपिएसँगै नेपालमा कोरोना संक्रमित हुनेको कुल संख्या दश हजार ९९ पुगेको मन्त्रालयले जनाएको छ । स्वास्थ्य मन्त्रालयको नियमित मिडिया ब्रिफिङमा मन्त्रालयका प्रवक्ता डाक्टर जागेश्वर गौतमले आज एकैदिन ५३८ जनाका कोरोना संक्रमण पुष्टि भएको जनाइएको छ । जसमा ४४८ जना पुरुष रहेका छन् भने ९० जना महिला रहेका छन् । उनका अनुसार आज भेटिएका संक्रमितहरुको स्वास्थ्य अवस्था सामान्य रहेको छ भने उनीहरु चिकित्सकको निगरानीमा रहेका छन् ।

मन्त्रालयका अनुसार अहिलेसम्म पीसीआर विधिबाट एक लाख ८६ हजार तीन सय ६६ र आरडीटी विधिबाट दुई लाख ७१ हजार ५ सय ८४ जनाको परीक्षण गरिएको छ । अहिलेसम्म क्वारेन्टाइनमा ८५ हजार ८ सय १३ जना छन् । त्यसैगरी सात हजार ८ सय ५१ जनाको आइसोलेसनमा उपचार भइाखेको छ ।

आज थप एक जनाको मृत्यु भएको मन्त्रालयले जनाएको छ । योसँगै नेपालमा मृतकको संख्या २४ पुगेको छ ।