जङ्गली हात्तीले सन्थाल परिवारको घर भत्कायो

भद्रपुर । झापाको बिर्तामोड नगरपालिका– ७ स्थित एक सन्थाल परिवारको जङ्गली हात्तीले घर भत्काएको छ । जङ्गली हात्तीले घर भत्काए पछि उक्त संथाल परिवाको बिचल्नी भएको छ । गए राति साढे १२ बजे दुई वटाको सङ्ख्यामा आएको जङ्गली हात्तीले फागु सोरेनको घर पूर्णरुपमा भत्काएर क्षतिग्रस्त पारेको हो ।

‘घर भत्काउन थालेपछि बिजुलीको तार चुँडिएर करेन्ट लागेपछि हात्ती भागेका थिए । नत्र मानवीय क्षति हुन्थ्यो’ स्थानीय शिक्षक डिल्लीराम चम्लागाईले भने । सुत्ने घर पूर्णरुपमा भत्किएपछि ३ छोरा र २ छोरीसहित सोरेन परिवार सानो घरमा बसिरहेका छन् । सोरेनकी श्रीमतीको दुई वर्षअघि निधन भएको हो । जनमजदुरी गरी गुजारा गर्ने सोरेन परिवारको घर हात्तीले भत्काएपछि बर्खामा निकै बिजोग हुनेभएको शिक्षक चम्लागाईले बताए ।