ट्रकले ठक्कर दिँदा एक वृद्धाको मृत्यु

भद्रपुर ९ बैशाख । झापाको भद्रपुरमा ट्रकले सिटी सफारीलाई ठक्कर दिँदा एक वृद्धा महिलाको मृत्यु भएको छ । मृत्यु हुनेमा भद्रपुर नगरपालिका ९ निवासी ६७ बर्षीया गायत्रीदेवी प्याकुरेलले रहेको प्रहरी कार्यालय झापाका डिएसपी राकेश थापाले जानकारी दिए ।

प्रहरीका अनुसार भद्रपुर १० स्थित मेची राजमार्ग अन्तरगत चाराआली केचना सडक खण्डमा बिहीबार बिहान साढे ९ बजे मे १ क २६७ नम्बरको ट्रकले मे १ ख ६४५८ नम्बरको सिटी सफारीलाई ठक्कर दिएको थियो । ठक्करबाट सिटीमा सवार प्याकुरेल सडकमा लडेको र ट्रकको चक्काले कुल्चिएपछि उनको घटनास्थलमै मृत्यु भएको प्रहरीले जनाएको छ ।

उक्त ट्रक भद्रपुरस्थित दक्षिणकाली प्यालिष्टक उद्योगको रहेको प्रहरीले जनाएको छ । ट्रक र चालकलाई प्रहरीले नियन्त्रणमा लिएको छ ।