नेपालमा आज थपिए २१० जना संक्रमित
काठमाडौँ । नेपालमा आज थप २१० जनामा कोरोना भाइरस संक्रमण पुष्टि भएको छ । योसँगै नेपालमा कोरोना संक्रमितको कुल संख्या १९ हजार २७३ पुगेको छ । स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले नेपालमा बितेको २४ घण्टामा २१० जनामा कोरोना भाइरसको संक्रमण पुष्टि भएको जानकारी दिए ।
उनका अनुसार कोरोना संक्रमण पुष्टि भएका संक्रमितहरु सबैको स्वास्थ्य अवस्था सामान्य रहेको छ भने उनीहरु चिकित्सकको निगरानीमा रहेका छन् । देशभरका प्रयोगशालामा ६ हजार ३७ नमुना परीक्षण गरिएको मन्त्रालयले जनाएको छ । क्वारेन्टिनमा १४ हजार ४७१ जना रहेका छन् । नेपालमा बितेको २४ घण्टामा थप १४६ जना कोरोना संक्रमण मुक्त भएका छन् । योसँगै नेपालमा कोरोना संक्रमण मुक्त भई अस्पतालबाट डिस्चार्ज हुनेको संख्या १४ हजार २१ रहेको छ । योसँगै नेपालमा कोरोना भाइसबाट मृत्यु हुनेको संख्या ४९ पुगेको मन्त्रालयले जनाएको छ । रौतहट र कैलाली जिल्लामा ५ सयभन्द बढी संक्रमित उपचाररत छन् भने भोजपुर, संखुवासभा, रसुवा, मनाङ र मुस्ताङ गरी पाँच वटा जिल्ला संक्रमणमुक्त रहेका छन् ।