अलैंचीलाई तेस्रो देश निर्यातका लागि आवश्यक पहलकदमी गर्ने
बिर्तामोड १७ माघ । सरोकारवालाहरुले बहुमूल्य नगदे कृषि बाली अलैंचीलाई तेस्रो देश निर्यातका लागि आवश्यक पहलकदमी गर्ने प्रतिबद्धता व्यक्त गरेका छन् । पछिल्लो केही वर्षयता अलैंचीको मूल्यमा लगातार गिरावट आई किसान तथा व्यवसायी निराश बनिरहेका बेला बिर्तामोडमा शुक्रबार आयोजित एक अन्तरक्रियात्मक कार्यक्रममा सरकारी तथा निजी क्षेत्रले संयुक्त रुपमा त्यस्तो प्रतिबद्धता जनाएका हुन् ।
नेपाली अलैंचीको ठूलो हिस्सा भारतमा मात्र निकासी हुने गरेको र भारतीय व्यवसायीले तोकेको मूल्यमा अलैंची बिक्री गर्नुपर्ने वाध्यता रहेकोमा संयुक्त रुपमा वैकल्पिक अन्तर्राष्ट्रिय बजार खोज्न सरकारी र निजी क्षेत्र अग्रसर भएका छन् ।
नेपाल अलैंची व्यवसायी महासंघ र उद्योग वाणिज्य तथा आपूर्ति मन्त्रालयको संयुक्त आयोजनामा आयोजित अलैंची निर्यातका समस्या र समाधान विषयक अन्तरक्रियामा सहभागी अलैंची व्यवसायीहरुले अलैंचीको मूल्यमा आएको गिरावटबाट परेको प्रभाव र निर्यात व्यापारमा भोग्दै आएको समस्याका बारेमा कुरा राखेका थिए । उनीहरुले अब पनि निर्यातमा विकल्प नखोज्ने हो भने अलैंचीको उत्पादन र व्यवसाय धरासायी हुने एवम् अलैंची खेतीबाट किसान र अलैंची व्यवसायबाट व्यवसायी पलायन हुनुपर्ने अवस्था आएको गुनासो गरेका थिए ।
नेपाल अलैंची व्यवसायी महासंघका अध्यक्ष राजकुमार कार्कीको सभापतित्वमा आयोजित कार्यक्रमका प्रमुख अतिथि महासंघका वरिष्ठ उपाध्यक्ष चन्द्रप्रसाद ढकालले परम्परागत निर्यात व्यापारबाट माथि उठ्न आवश्यक भइसकेको बताउँदै विश्वबजारमा प्रतिस्पर्धी ढंगले अन्तर्राष्ट्रिय मूल्य–मान्यतामा आधारित निर्यात व्यावासयिक प्रक्रिया अघि बढाउन र वैकल्पिक बजारहरुको खोजीमा महासंघले सहयोग गर्ने प्रतिबद्धता व्यक्त गरे । उनले ठूलो परिमाणमा विदेशी मुद्रा भित्र्याउने अलैंचीको प्रवद्र्धनमा सरकारले चासोपूर्वक ध्यान पुर्याउनुपर्ने बताउँदै त्यसका लागि सरकारी निकायलाई महासंघले घच्घच्याइरहने विश्वास दिलाएका थिए ।
महासंघका संस्थापक अध्यक्ष राजेन्द्रकुमार घिमिरेले अलैंचीको विकास, प्रवद्र्धन, संरक्षण र निर्यात व्यवसाय सहज बनाउन सरकारले उल्लेख्य काम गर्न नसकेको भन्दै अलैंचीलाई महत्व दिन आग्रह गरे । कार्यक्रममा महासंघका निवर्तमान अध्यक्ष निर्मल भट्टराई, व्यवसायी सुजित वंशल, विजय खाकी लगायतले व्यवसायी मात्र नभई किसानले पनि भोग्दै आएका समस्याका बारेमा जानकारी गराएका थिए ।
कार्यक्रममा उद्योग वाणिज्य तथा आपूर्ति मन्त्रालयका उपसचिव दुर्गा भुषालले सहभागीहरुको गुनासा–समस्या सुनेपछि अलैंचीको क्षेत्रमा सरकारको तर्फबाट थप योजनाहरु अघि बढाउने प्रतिबद्धता व्यक्त गरे । उनले निर्यातजन्य वस्तुलाई सरकारले सधैं प्राथकिमकतामा राखेको भन्दै अलैंचीको तेस्रो बजार खोजीमा सरकारले पहलकदमी गर्ने बताए ।
कार्यक्रममा नेपाल उद्योग वाणिज्य महासंघका वस्तुगततर्फका उपाध्यक्ष अञ्जन श्रेष्ठ, महासंघको निर्यात समितिका सभापति मनिषलाल प्रधान, केन्द्रीय सदस्य उमेश डालमिया, १ नं प्रदेश अध्यक्ष टिकाराज ढकाल लगायतले कोभिड–१९ का कारण सबैखाले उद्योग–व्यवसाय धरासायी भएको भन्दै सरकारले व्यवसायीलाई उकास्ने किसिमका कार्यक्रम ल्याउनुपर्ने धारणा राखेका थिए ।
नेपालमा वार्षिक सरदर ५ लाख केजी अलैंची उत्पादन हुँदै आएको छ भने लगभग ५ अर्ब नेपाली रुपैयाँ बराबरको विदेशी मुद्रा भित्रिने गरेको महासंघका कार्यालय प्रमुख अनिल ढुंगानाले जानकारी दिए ।